ആഗോള വിപണിയില് ലോഹങ്ങളുടെ വില തകര്ച്ച തുടരുന്നു. സ്വര്ണ്ണത്തിനും വെള്ളിക്കും പിന്നാലെ പ്ലാറ്റിനം, പലേഡിയം എന്നിവയുടെ വിലയിലും വന് ഇടിവാണുണ്ടായിരിക്കുന്നത്. ഇന്ന് നടന്ന വ്യാപാരത്തില് നിക്ഷേപകര് വന്തോതില് ലോഹങ്ങള് വിറ്റഴിച്ചതോടെ വില കഴിഞ്ഞ ഏതാനും മാസങ്ങള്ക്കിടയിലെ ഏറ്റവും താഴ്ന്ന നിലവാരത്തിലെത്തി.
പ്ലാറ്റിനം വിപണിയില് 35% ഇടിവ്
ഏറ്റവും പുതിയ കണക്കുകള് പ്രകാരം പ്ലാറ്റിനം വിലയില് റെക്കോര്ഡ് ഇടിവാണുണ്ടായിരിക്കുന്നത്. അടുത്തിടെ രേഖപ്പെടുത്തിയ 2,885 ഡോളര് എന്ന ഉയര്ന്ന നിരക്കില് നിന്ന് 35.6 ശതമാനമാണ് പ്ലാറ്റിനത്തിന് വില കുറഞ്ഞത്. ഇന്ന് മാത്രം പ്ലാറ്റിനം വില 14 ശതമാനം ഇടിഞ്ഞ് ഒരു ഔണ്സിന് 1,858 ഡോളറിലെത്തി. കഴിഞ്ഞ മൂന്ന് ദിവസത്തിനിടെ മാത്രം ഈ ലോഹത്തിന്റെ മൂല്യത്തില് 30.2 ശതമാനത്തിന്റെ കുറവുണ്ടായി. പലേഡിയം വിലയിലും അതിന്റെ റെക്കോര്ഡ് നിരക്കില് നിന്ന് 31 ശതമാനം ഇടിവ് രേഖപ്പെടുത്തി. 2025-ല് പ്ലാറ്റിനം 126 ശതമാനവും പലേഡിയം 81 ശതമാനവും വളര്ച്ച നേടിയിരുന്നു. എന്നാല് ഈ നേട്ടങ്ങളെല്ലാം പുതിയ തകര്ച്ചയോടെ ഇല്ലാതായിരിക്കുകയാണ്. റെക്കോര്ഡ് ഉയരങ്ങളില് നിന്ന് സ്വര്ണ്ണവില 25 ശതമാനമാണ് താഴേക്ക് പതിച്ചത്. വെള്ളി വിപണിയിലാണ് ഏറ്റവും വലിയ തകര്ച്ച പ്രകടമായത്. കഴിഞ്ഞ മൂന്ന് വ്യാപാര ദിനങ്ങള്ക്കുള്ളില് വെള്ളി വില കിലോയ്ക്ക് 1,94,243 രൂപ (46%) ഇടിഞ്ഞു. കഴിഞ്ഞ വ്യാഴാഴ്ച കിലോയ്ക്ക് 4,20,048 രൂപയായിരുന്ന വെള്ളി ഇന്ന് 2,25,805 രൂപയിലേക്ക് താഴ്ന്നു. ഇന്ന് മാത്രം വിപണിയില് 40,000 രൂപയുടെ കുറവാണുണ്ടായത്.
തകര്ച്ചയ്ക്ക് പിന്നിലെ കാരണങ്ങള്
അമേരിക്കന് പ്രസിഡന്റ് ഡൊണാള്ഡ് ട്രംപ് ഫെഡറല് റിസര്വ് തലവനായി കെവിന് വാര്ഷിനെ നാമനിര്ദ്ദേശം ചെയ്തതാണ് വിപണിയെ പിടിച്ചുലച്ചത്. പണപ്പെരുപ്പത്തിനെതിരെ കര്ശന നിലപാട് സ്വീകരിക്കുന്ന വ്യക്തിയാണ് വാര്ഷ് എന്നത് ഡോളറിന്റെ മൂല്യം ഉയരാന് കാരണമായി. ഡോളര് കരുത്താര്ജ്ജിച്ചതോടെ നിക്ഷേപകര് സ്വര്ണ്ണവും വെള്ളിയും വിറ്റഴിച്ച് ഡോളറിലേക്ക് നീങ്ങി. ആഗോളതലത്തിലെ രാഷ്ട്രീയ അനിശ്ചിതത്വങ്ങളും പുതിയ യുഎസ് നയങ്ങളോടുള്ള വിപണിയുടെ പ്രതികരണവുമാണ് ഇപ്പോഴത്തെ ഈ അപ്രതീക്ഷിത വിലത്തകര്ച്ചയ്ക്ക് പ്രധാന കാരണമെന്ന് വിദഗ്ധര് വിലയിരുത്തുന്നു.
