എയ്ഡഡ് സ്കൂൾ ഭിന്നശേഷി നിയമനം ;മാനേജ്മെന്റിന് ഇനി നിയന്ത്രണമില്ല

തിരുവനന്തപുരം : എയ്ഡഡ് സ്കൂളുകളിലെ ഭിന്നശേഷി സംവരണ തസ്തികകളിലെ നിയമന അധികാരം സർക്കാർ ഏറ്റെടുത്തതോടെ ഇതിൽ മാനേജ്മെന്റുകൾക്ക് ഇനി നിയന്ത്രണമില്ല. പൊതുവിദ്യാഭ്യാസ വകുപ്പിലെ ഉദ്യോഗസ്ഥർ ഉൾപ്പെട്ട ജില്ലാതല സമിതികൾ തിരഞ്ഞെടുക്കുന്നവർക്ക് നിയമനം നൽകുന്ന ചുമതല മാത്രമാകും മാനേജ്മെന്റകൾക്ക്. നിയമനത്തിന് അഭിമുഖം നടത്തുന്ന സമിതിയിൽ മാനേജ്മെന്റിന് പ്രാതിനിധ്യവും ഇല്ല. സർക്കാർ നടപടിക്കെതിരെ മാനേജ്മെന്റുകൾ ഹൈക്കോടതിയെ സമീപിച്ചിട്ടുണ്ടെങ്കിലും സുപ്രീംകോടതി ഉത്തരവ് അനുസരിച്ച് നിയോഗിച്ച സർക്കാർ സമിതികൾ ഇന്നലെ പ്രവർത്തനം തുടങ്ങി. എംപ്ലോയ്മെന്റ് എക്സ്ചേഞ്ചുകളിൽ രജിസ്റ്റർ ചെയ്തവരുടെ അഭിമുഖം നടത്തി നിയമനം നൽകേണ്ടവരുടെ പട്ടിക മാനേജ്മെന്റുകൾക്ക് കൈമാറുകയാണ് ജില്ലാതല സമിതികളുടെ ചുമതല. അപ്പീൽ അധികാരികളുടെ ചുമതലയാണ് സംസ്ഥാന സമിതിക്ക്.